mércores, 5 de abril de 2017

POLO MEDITERRÁNEO

O alumnado de Voluntariado Escolar organizou o venres 24 de marzo, en colaboración coa ONG AGARESO (Asociación Galega de Reporteiros Solidarios), unha acción do que se soe chamar “comunicación de guerrilla”, para chamar a atención sobre as penalidades polas que pasan os migrantes que, buscando fuxir da morte e a opresión, arriscan as súas vidas para chegar a unha Europa que non os está a recibir con brazos abertos.



Aquí tedes algunhas fotografías / un vídeo / unha presentación sobre o seu traballo.









Mediterráneo from biblioteca victoria moreno on Vimeo.

I CERTAME ILUSTRACIÓN

O xurado integrado por profesorado, membros da ANPA e alumnado do centro ven de facer público as obras gañadoras do I CERTAME DE ILUSTRACIÓN:

              Categoría A:
                               1º Premio           Sabela Alonso Freire (3ºC)
                               2º Premio           Jennifer Macedo Malvido (3ºA)
                               Accésits             Samia Baait El Khalgi (3ºA)
                                                          Ada Fernández García (3ºB)
                                                          Manuel Tomé Antelo (3ºB)
                Categoría B:
                               1º Premio           Ariana Vergaray Armas (1ºbachA)
                               2º Premio           Catalina Fariña Fernández (2ºbachB)
                               Accésits              Tamara Iglesias Varela (4ºB)
                                                                       Ana Peón Pousa (4ºA)

                             PARABÉNS AOS PREMIADOS E MOITAS GRAZAS A TODOS POR PARTICIPAR!!!!


As obras presentadas foron realizadas como ilustración da portada das seguintes obras:

Categoría A: Marcovaldo ou as estacións na cidade (de Italo Calvino)
Categoría B: O sol do verán (de Carlos Casares)

SABELA ALONSO


JENNIFER MACEDO
ARIANA VERGARAY

CATALINA FARIÑA

xoves, 22 de decembro de 2016

Encontros cos autores. A Ilustración.
O pasado venres estivo na Biblioteca falando co alumnado de Debuxo Artístico o ilustrador Marcos Viso (http://marcosvisoilustracion.com/). Compartiu con nós tanto cuestións técnicas, sobre o desenvolvemento do seu traballo como ilustrador, como outras máis persoais: como chegou á ilustración, o que supón adicarse a un oficio creativo, as dificultades, as dúbidas, as satisfacións… Trouxo orixinais das súas obras xa publicadas (Todos os soños, Unha casiña branca, Parar o mundo, Vaite xa…) ou en proxecto, e explicou tanto técnicas artísticas como os pasos que hai que dar na relación cos autores, as editoriais…
A charla terá continuidade nas vindeiras semanas cun formato de obradoiro.
Grazas por todo, Marcos.


Que ler no Nadal


luns, 5 de decembro de 2016

COMPAÑEIROS


Por esas cousas que pasan, resulta que nos demos conta de que no noso blogue faltaba algo fundamental: un enlace ao blogue do Equipo de Dinamización da Lingua Galega que, dirixido por Mariló, traballa arreo no noso IES.
Remediamos inmediatamente o lapso e aquí tedes o enlace directo ao blogue, na marxe esquerda da nosa páxina principal . Seguiremos en contacto…

xoves, 17 de novembro de 2016

VII CERTAME DE NARRATIVA


Como cada ano, e van sete, a Biblioteca, o EDL, a AMPA e diversos Departamentos didácticos colaboran na organización de diversos certames. Neste curso, seguindo o eixe ESTACIÓNS CON ARTE, proporemos varios, empezando co VII CERTAME DE NARRATIVA.
Tedes a información nas aulas e as escaleiras, pero aquí vai tamén. AGARDAMOS AS VOSAS OBRAS!!!!
 
BIBLIOTECA  MARÍA  VICTORIA  MORENO
IES GONZALO TORRENTE BALLESTER
VII CERTAME DE NARRATIVA

 1.- A Biblioteca María Victoria Moreno, o Equipo de Dinamización da Lingua Galega  e a ANPA do IES Gonzalo Torrente Ballester convocan o VI certame de narrativa, no que poderán participar alumnos/as e ex-alumnos/as do instituto.
2.- As obras serán narracións orixinais e inéditas dun mínimo de 1 folio e un máximo de 5 folios, escritos a dobre espazo e por unha soa cara.
3.- O tema das historias deberá estar relacionado co eixo das actividades da Biblioteca neste curso escolar: Estacións.
4.- As obras deberán incluír en calquera parte o seguinte fragmento da obra “O SOL DO VERÁN” de CARLOS CASARES: “A partir daquel instante, o mundo borrouse dos meus ollos e dos meus oídos, a luz ferinte do sol convertiuse en néboa…”
5.- O título das obras presentadas ao concurso terá un máximo de cinco palabras.
6.- Establécense as seguintes categorías:
A. Primeiro, segundo e terceiro cursos da ESO.
B. Cuarto curso da ESO, Bacharelato, Ciclos Formativos, e ex-alumnos/as.
7.-  O prazo de presentación de orixinais comezará o 4 de novembro e rematará o 2 de decembro de 2016. As obras presentaranse na biblioteca do instituto nun sobre pechado en cuxo exterior figurará un lema ou pseudónimo e a categoría pola que se participa. Entregarase outro sobre pechado co lema ou pseudónimo no exterior e en cuxo interior figurarán os seguintes datos do/a autor/a: nome e apelidos, curso e grupo (no seu caso).
8.- Un xurado integrado por profesorado, membros da ANPA e alumnado do centro seleccionará as obras gañadoras. A tal efecto, establécense dous premios (1º e 2º) en cada categoría. O xurado poderá conceder mencións a outras obras ou deixar algún premio deserto.
9.- Os premios serán os seguintes:
·         Os premiados recibirán un vale para mercar material escolar, deportivo, informático… en tendas de Pontevedra.
·         O xurado seleccionará un máximo de 10 títulos das obras participantes que serán utilizados para rotular os lombos dos libros dos murais da biblioteca.
10.- Os premios serán entregados no mes de maio, coincidindo coas actividades do “Día das Letras Galegas”.

luns, 7 de novembro de 2016

Parabéns¡¡

Hai tempo que sabemos de ti. Tres veces premiamos os teus relatos nos nosos certames literarios. E agora a Consellería recoñéceche os teus méritos concedéndoche o PREMIO EXTRAORDINARIO AO RENDEMENTO ACADÉMICO NA ESO. Moitas felicidades, e ánimo para os teus futuros retos!!!
">

venres, 28 de outubro de 2016

Voluntariado escolar

Como sabedes, este curso empezamos unha asignatura nova, “Voluntariado escolar”, organizada pola Biblioteca. Entre outras actividades, o alumnado que a cursa organizou unha charla de Amnistía Internacional para o 11 de novembro sobre os Dereitos Humanos, pero só é a primeira de varias accións que esperamos ir contándovos. Ata pronto!

xoves, 20 de outubro de 2016

Parabéns, Dolores!!!

Hoxe abrimos o noso blog para felicitar a Dolores Redondo, flamante gañadora do premio Planeta 2016. Lembramos con ledicia o seu paso polo noso instituto, da man de Domingo Villar e Pedro Feijóo nos Encontros en negro que celebramos en febreiro do ano pasado.
Contar con tres grandes da literatura actual foi un fito inesquecible e un placer para todos.
Agardamos con impaciencia a publicación de “Todo esto te daré”, a obra merecedora do premio, ambientada en Galicia… E a película “O guardián invisible”. O premio coincide coa celebración do “Día de las escritoras”, Una iniciativa impulsada por la Biblioteca Nacional de España, la Asociación Clásicas y Modernas para la igualdad de género en la cultura y la FEDEPE, la Federación Española de Mujeres Directivas, Ejecutivas, Profesionales y Empresarias. Leranse fragmentos de obras escritas por trinta escritoras en castelán, galego, catalán e euskera: Teresa de Jesús, Sor Juana Inés de la Cruz, Fernán Caballero (Cecilia Böhl de Faber), Gertrudis Gómez de Avellaneda, Concepción Arenal, Rosalía de Castro, Emilia Pardo Bazán, Gabriela Mistral, Alfonsina Storni, Rosa Chacel, María Zambrano, Mercè Rodoreda, Gloria Fuertes, Carmen Laforet, Carmen Martín Gaite e Ana María Matute entre outras. A quen máis incluiríades na lista?

mércores, 19 de outubro de 2016

Formación de usuarios

Principio de curso e acollida ao novo alumnado de 1º de ESO. Ademais das actividades de formación de usuarios, lembrade que os profesores e os compañeiros estamos para axudarvos. E neste curso coa colaboración do alumnado de Voluntariado Escolar de 2º de bacharelato…

martes, 18 de outubro de 2016

Benvidas, familias!!

Aproveitamos as reunións organizadas no instituto coas nais e pais para lembrarvos que a Biblioteca tamén é vosa… Agardámovos!!

luns, 17 de outubro de 2016

Estamos de volta¡¡¡¡

Outro curso que empezamos na Biblioteca Mª Victoria Moreno. Desta vez, desde a Consellería propóñennos o lema “Biblioteca escolar, territorio das Artes”. O lema convida a explorar fórmulas para espertar nos lectores e nas lectoras o interese por achegarse e apreciar os produtos artísticos, pero sobre todo a experimentar o pracer de expresarse a través da música, a pintura, a arquitectura, a danza, o teatro, a literatura, a escultura, as artes visuais (cine, cómic, fotografía, videocreacións, videoxogos). ... E parece que os membros da Academia do Nobel escoitaron a proposta, premiando a Bob Dylan, e vencellando así música, literatura e cultura popular.

xoves, 4 de xuño de 2015

Unha choiva de premios...

Nestes últimos días, divers@s alumn@s do IES recolleron premios e galardóns en certames organizados por distintas entidades municipais, culturais e pedagóxicas. Desde a Biblioteca, queremos dar os nosos parabéns a todas @s premiad@s, porque, dalgún xeito, son premios tamén para o centro. Noraboa!!! IRIA TARRÍO PAZOS: 1º PREMIO de ENSAIO SUBVERSIVO "GUILLERMO DOMÍNGUEZ" do certame organizado pola Asociación Cultural Colectivo Xelmírez e coa colaboración da Consellería de Cultura,Educación e Ordenación Universitaria. PALOMA OTERO LÓPEZ: 1º PREMIO na categoría de 2º Ciclo da ESO e Bacharelato no IX Concurso de Fotografía Matemática da IX Feira Matemática 2015. E no "Ben veñas, Maio", déixovos unha imaxe que reflicte o título desta entrada: Unha choiva de premios...

xoves, 28 de maio de 2015

Sabela González no IES

Sabela González vén de publicar no seu Blog `Gramática de Corpos´ unha entrada onde comenta a súa visita ao noso IES, na última xornada de "Entre Libros e letras". Tendes o enlace, premendo aquí. Estas son algunhas das cousas máis interesantes que di nela. "Fun convidada como madriña do acto para botar un pequeno discursiño e para facer a entrega de premios (dar diplomas e sorrir, e nin saio con xeito en todas as fotos, mimadriña!). Ao chegar cun chisquiño de tempo puiden ver tamén a biblioteca, non só grande e ateigada de libros de fantasía con motivo do tema do acto deste ano, senón tamén cuns murais preciosos nos que os lombos dos libros levan os nomes de escritores e escritoras (e está o meu!)...Para poder escribir, hai que ler. Se me apurades, para vivir ao xeito hai que ler. Pero hai que ler de todo, ata dar co noso. Hai que ler o que a cada un e cada unha lle pete. Ler co criterio preparado e os ollos ben abertos, para decidir por nós mesmas que é o que nos aburre, que é o que nos fascina e nos fai querer máis... Aprender que non lle pode gustar todo a todos, nin ten por que. A outra conclusión, a outra cousa importante para escribir, pero tamén para a vida, é que se hai que equivocar. Moito. Hai que meter a pata ata o fondo, erguerse e volver a intentalo, polo mesmo ou outro camiño...Esta foi a miña mensaxe. Pedinlles que leran, que gozasen co que escriben, que se trabucasen e seguisen sorrintes para adiante con todas as historias da vida. Porque as historias están en todas partes (díxenlle e dígovos, por se non o sabiades), aínda que alguén vos diga o contrario. As historias escríbense en novelas, contos e poemas. Escríbense en series, pelis e videoxogos. Escríbense en tuits, blogs ou diarios agochados baixo a cama. Pero escríbense e deben escribirse. E nelas imos deixando a pegada do que somos." Moi interesante. Grazas, Sabela.

luns, 25 de maio de 2015

Serafín Marcos no IES

O luns, 18 de maio, o alumnado de 3º ESO asistiu á representación que o actor Serafín Marcos fixo sobre a figura homenaxeada este ano no Día das Letras Galegas, Xosé Filgueira Valverde. Divertida e amena foron dous dos adxectivos que máis se escoitaron entre a rapazada.

Entrega Premios "Entre o Libro e as Letras"

O venres, día 15 de maio, e para entregar os premios do V Certame de Narrativa, II de Fotografía Matemática, I de Poesía e da VII Olimpíada Cultural, tivemos unha madriña de excepción, Sabela González, autora dunha das sagas máis exitosas da literatura galega actual, As crónicas de Landereina.Veu para entregar premios pero tamén para deleitarnos coas súas reflexións sobre a escrita e a lectura. Foi un bo día. Noraboa a tod@s @s premiados.

Entre o Libro e as Letras- 2015

Este ano, e como comentaramos no tríptico tivemos varios actuacións para celebrar o noso "Entre o libro e as letras-2015". Déixovos imaxes para lembrar uns días de moito moviemento na biblioteca. Grazas a tod@s @s que colaboraron e participaron e que permitiron que de novo, o IES fose un auténtico festival da cultura. E sobre todo, grazas ao equipo de biblioteca de CPI A cañiza que permitiunos mostrar a súa xenial exposición, "A literatura fantástica".

venres, 24 de abril de 2015

II Certame fotográfica matemática

Xa podedes votar pola fotografía que máis vos guste. Premede neste enlace VOTA e contestade a enquisa. Ánimo e que gañe o mellor. Aquí tedes un enlace para mirar as fotos participantes.

mércores, 15 de abril de 2015

PLIEGUES MATEMÁXICOS

O xoves pasado, dia 9, tivemos unha fantastica sesión de xogos matemáticos cos matemagos Fernando Blanco e Miguel Ángel Vidal. O alumnado disfrutouno de manera espacial. Aquí vos deixo un collage con algunhas imaxes do acto.

luns, 13 de abril de 2015

Entre o LIBRO e as LETRAS 2015

Xá temos o programa de actividades, organizado pola Biblioteca, coa colaboración do Equipo de Dinamización da Lingua Galega e a ANPA O Pino, para as próximas datas ( Día do Libro, Día das Letras Galegas). Igual que outros anos, veñen baixo o título de "Entre o Libro e as Letras", e comprenden actividades de moi variado xeito, como concursos de narrativa ( temos que agradecer a Sabela González que, este ano,actúa como "fada madriña" do certame) e poesía ( con Lucía Novás, como presidenta do xurado. Un luxo), charlas con escritoras ( Olalla Cociña e Sabela González), exposicións e mostra de traballos feitos polo alumnado ( "Mulleres aventureiras, viaxeiras...", " A literatura fantástica", con paneis cedidos polo CIP da Cañiza, " Sabela González", " Xosé Filgueira Valverde" ) e a VII edición da nosa "Olimpíada", con preguntas que recollen temas tratados nestas xornadas. Agardamos que, como os anos anteriores, a comunidade educativa disfrute desta oferta. Aquí vos deixo, o tríptico das xornadas:

mércores, 8 de abril de 2015

Pliegues matemáxicos

Mañá, xoves, 9 de abril, vaise celebrar, una actividade titulada : PLIEGUES MATEMÁXICOS. Dous son os magos- matemáticos: Fernando Blasco e Miguel Ángel Vidal, que desenvolverán xogos para acercar ás matemáticas ao alumnado. Este actividade realizarase no Salón de Actos, entre as 10, 25h. a 12,05 h, PARA O ALUMANDO DE 2º ESO. Fernando Blasco é Profesor Titular de Matemática Aplicada na UPM. Está interesado na divulgación científica, a relación entre educación e divulgación e na introdución da ciencia como parte da cultura. É meigo afeccionado, membro do Círculo Máxico de Madrid da Sociedade Española de Ilusionismo. Participa asiduamente como ponente en cursos de formación de profesorado, de monitores de museos científicos e en numerosos eventos de divulgación científica, dentro e fóra de España. É autor de 'Matemagia' (2007), 'El periodista Matemático' (2009) e ' Tu hijo puede ser un genio de las mates' (2013). Ha coordinado a edición de 'Gardner para principiantes' (2014)'. Colabora con RNE no programa de divulgación 'A hombros de gigantes' e é autor do blog 'Mathedonia' na plataforma da revista “Investigación y Ciencia”. Miguel Ángel Vidal Martín , licenciado en Matemáticas pola Universidade de Santiago de Compostela, após 19 anos dedicados a ensinar en institutos das provincias de Ávila e Pontevedra, os últimos 6 anos no IES PEDRO FLORIANI de Redondela (Pontevedra) traballando, exclusivamente, con estudantes de PDC (Programa de Diversificación de Currículo), fundamentalmente, por adolescentes con dificultades académicas diversas. Ten escrito un libro en formato cómic en cor: “Dobrando as Mates. Proxecto con papiroflexia de toda unha tribo”, no que, mediante a papiroflexia, explico coñecementos matemáticos. Deu algunhas charlas: TEDxGalicia en 2011 e en VINA Trobada de Presentació d`Experiències d`Aplicació de Pedagogia Sistèmica a lles diferents etapes i contexts educatius (UAB), en 2013. Organizou o I Festival de Origami en Redondela, para recaudar fondos para UNICEF, no que construíron un axedrez (con papel reciclado) de vinte e cinco metros cadrados de superficie e uns cen quilos de peso.

mércores, 25 de febreiro de 2015

Imaxe resumo dos Encontros e outros agasallos...

Desde a Biblioteca do IES A Xunqueira II, a nosa amiga Pepa fai unha acertada crónica do que foi a xornada, dos temas que se trataron e da empatía que houbo entre escritores e público.Coma sempre, gracias, Pepa.

xoves, 19 de febreiro de 2015

Os Encontros na rede

Apabullados, anonadados e todos os adxectivos que querades poden ser engadidos. Sinalamos só algunhas das notas aparecidas hoxe na rede sobre os Encontros en negro. Blog de Pedro Feijoo. Non se pode explicar mellor. Ramón Rozas: gran presentador e bo amigo do IES. Manuel Bragado, editor de Xerais. E a prensa...
Gracias a todos por estar tan pretiño de nós.

Tríptico dos Encontros en Negro

Coa xornada de onte, presentábamos un triptico sobre os autores participantes. Non quedou ningunha mostra!

ENCONTROS EN NEGRO

Fantástica a xornada que disfrutamos onte no IES, con tres grandes autores do panorama literario actual: Dolores Redondo, Domingo Villar e Pedro Feijoo. O tema era a novela negra, pero tivemos a sorte de poder escoitar falar de creación, de literatura de xéneros, de produción e de vida en definitiva. Gracias aos autores pola súa maestría e gracias ao público por acudir nun día festivo en Pontevedra. Aquí tedes algunhas imaxes do encontro.